زنجيل ابو ذيات

بعد الجرى شتعتقد شحجيلك وشبجي
من دون كل الشبج بس الهوى بشبجي
ادري بهواك احترك وادري الشعر شبجي
جي كلت احبك عدل مادورت لوفات
جان القلق يكتلك عن موعدي لوفات
شو هسه درت الوجه من ظلي مر لوفات
بس هاي دنيه غبن ماترحم العدلين
لا رحمت الموتو ولارحمت العدلين
تغلبني غش واسالك وتكلي متعادلين
ياعدل هذا ولك ومنين اجه عدلك
جابتك امك عوج وهسه انه اجي عدلك !!
مليون زله الك ياايد اللي تعدلك
جنت اني اشوفك ملك نازلي من السما
حنظل اضوكك جنت واكول من السمه
تالي تسم الكلب غيرك منو السمه
ثاري الوفه مو وفه ومنين اطيب انساب
كدامك اني اانهنت كلبي اللعب انسب
ماشفت دمعك نزل شك الرمش وانسب
بانت جدم مو دمع وانته ولا حاسبه
كلبك جرحني اشكثر لزمه اساله حاسبه
جروحي ماالهن عدد ويدوخن الحاسبه
يالجنت كل دنيتي وبكلبي عشت ونمت
عبالي نكبر سوه باجر سويه نموت
جا توكف ويه الحجو واللي عليه نمت
هذا الوكت موحلو ياروحي والسماج
الصاحب اصبح عدو وابن امج السمج
السمجه تنصب شرك وتوكع السماج
اخذوك مني ظلم بعدك علي جني
وهمو ملهن عدد بس ابعدت جني
شنساك واني صرت مثل اللي بي جني
ماشوف بس صورتك واشتمك ويه النفس
ومن صدري ماطلعك خايف يصيبك نفس
تتصور ابخل اذا كتلي اريد النفس ؟؟؟